GURINDAM MINANG

Pusako Rumah Godang Sungai Baringin Kab 50 Kota

Pepatah Patitiah Minangkabau
Sofyan Dt.Bandaro

Ceni Budaya Tanah Aie
Lipua dizaman panjajahan
Kini lah jadi buah pikie
Sadang didalam panggalian


Kito dialam minangkabau
lah patuik tasintak pulo
Katiko maso alun talampau
Elok dirunuik tambo lamo

Kato pepatah caro minang
Patitiah luhak nan tgo
Nan turun dari parpatiah sabatang
Disabuik kato pusako

Nan disabuik kato pusako
Yaitu kato undang-undang
Dek banyak tak namuah lupo
Dek lamo tak namuah hilang

Alah bauriah bak sipasin
 Kok akiak alah bajajak
Abih taun baganti musim
Sandi adat jan di anjak

Kasah ambun kasah biludu
Batanti bajaik tapi
Baturap jo banang sirah
Alah bahampai di sandaran
Mintak ampun ambo ka pangulu
Nan salirik duduak ditapi
Nan saedaran adok katangah
Maaf jo sambah dimuliakan

Anak itiak ateh dalimo
Anak alang dalam  baluka
Ketek nan tidak tapuji namo
Gadang nan indak tapuji gala

Tungkek gala amat dirajo
Sitaba dibaliak pakan
Kalau salah tobatlah ambo
Kok bana samo diamalkan

Bukan tambilang manggulampai
Tambilang panggali kuburan
Bukan mambilang tando pandai
Mambilang untuak pasambahan

Atai-atai si bungo atai
Lah kambang malah bungo sitawa
Lamo iduik banyak dirasai
Indak manusia nan tak gawa

Palupuah batang malapari
Pucuak manimpo aka jumbai
Dibaok nak rang ka Batipuah
Sungguahpun ambo tagak badiri
Bukanlah ambo rang cadiak pandai
Ujuiknyo duduak nan basimpuah.

Naiak gunuang banyaklah kabuik
Lalu karimbo indojati
Kayu gadang banyak babuah
Bacampua jo kayu kamat
Takuk ganta ambo manyabuik
Pangulu banyak nan sati
Urang gadang banyak nan batuah
Tuanku banyak nan kiramaik

Ambo nanko jolong marambah
Antah sapek antah banio
Ladiang nan usah diantakan
Ambo nanko jolong manyambah
Antah dapek antah moh tido
Salah nan usah digalakkan

Sadang mingkudu lai bagatah
Kunun kok pulo cubadakmmudo
Sadang pangulu lai nan gawa
Kunun kok pulo kami nan mudo-mudo

Manembak tibo dihulu
Kanailah pantau dek manjalo
 Luhak dibari ba panghulu
Rantau dibari barajo-rajo

Mancampak tibo dihulu
Dicatak batang cubadak
Talang taimpok patah-patah
Luak dibari ba pangulu 
Tagaknyo indak tasondak
Kok tabulintang inyo patah

Kanailah pantau dalam jalo
Dirandang daun ampaleh
Dipatah dalam parahu
Rantau dibari barajo-rajo
Malenggang inyo indak tapapeh
Bia tabujua nyo lalu

Kabau gadang lari manduo
Tiok dipanah tiok kanai
Kampuang dibari ba nantuo
Rumah dibari batungganai




Urang Tuo di Minangkabau

Minangkabau talago dulunyo
Takalo maso saisuak
Di pagaruyuang rajo bartahta
Urang tuo ampek perkaro
Partamo Tuo manukuak
Mambari patunjuak jo pangaja

Sajak dininiak nan baduo
Katumangguangan jo parpatiah
Lareh nan duo parentah bana
Tuo busuak tuo manyeso
Dima duduak urang manyisiah
Dima tagak urang mainda

Adopun pariangan padang panjang
Itu nan tampuak tangkai alam
Inyo badiri sandirinyo
Tuo kutuak bancian urang
Awak nyinyia muncuangnyo tajam
Pantang batupang sagalo kato